我想花少少時間，同大家分享我點樣透過裸體主義，去同自然界建立聯繫。但係，首先等我介紹吓自己。我係一位男性，喺呢個美麗無比嘅星球上，到而家已經度過咗接近五十八年。我一直最喜歡嘅係戶外活動，尤其係喺森林入面。我原來從事銷售工作，不過當我四十幾歲嘅時候，事業上發生咗啲轉變，於是就轉行去咗做園藝家。去到而家，我最鍾意嘅仍然係戶外活動，抱住友善嘅心態，同大自然緊密合作。
我對裸體嘅熱愛係由幾時開始嘅呢？自細細個以嚟，我一路都好喜歡赤身裸體。記得當年有一段好長嘅時間，由於父母對裸體主義呢個概念完全唔熟悉，我一路都感到好困惑。有時我會喺屋企剝光豬，但係大多時我都會走入樹林裏邊，搵個有安全感又靜嘅地方除嗮啲衫。之後到我二十出頭，同朋友一齊去游水嘅時候，每次落水，我會確保周圍冇其他人睇到，然後就除咗條泳褲。當時我非常之享受喺水入便赤身裸體同埋感受湖水帶俾身體嘅清涼感。不過，呢種經驗往往令我覺得自己一方面蠱靈精怪，另一方面同其他人好唔一樣。
大約五十歲嘅時候，我開始喺大自然裏邊做一啲短路程嘅徒步旅行。雖說我好享受，但係同時都唔係冇心理壓力㗎。我好想赤裸身體，但又唔想打擾到人。有一日，我咁啱發現咗一個好靚、好偏僻嘅地方，可以話係一個理想嘅游泳場所。入水之後，一股輕鬆暢快嘅感覺慢慢湧上心頭。喺涼快嘅湖入面游水，獨自一人身處樹木茂密嘅環境，我見到魚狗之類嘅雀仔喺身邊飛嚟飛去，近在咫尺。不過，就算我闖入咗佢哋嘅生存空間，啲雀鳥仍然好似一啲都唔介意咁。遇到呢種情況，我越嚟越覺得自己唔再係一個過客，而係達到咗天人合一嘅境界。逐漸地，我對自己嘅裸體變得更加自在，於是就放膽去一啲路程更長嘅徒步旅行。
大約兩年前，我哋兩夫婦搬到鄉下嘅一間小屋，而呢間屋有個細細嘅農場。一出門，行幾分鐘路之後，就會到達附近嘅一笪樹林。 當時，我亦都開始閱讀更多有關天體主義嘅資料，仲成為咗荷蘭天體主義聯合會嘅成員，從而更加深入呢個主題。好可惜，當我老婆喺度嘅時候，佢絕對唔會接受我喺戶外赤身裸體；屋内佢好勉強咁接受得到，不過範圍狹窄，只局限於睡房同埋沖涼房之内。所以，我唯有一個人暗中去摸索，慢慢諗辦法。後尾我會好早起身，赤身裸體咁行過我哋嘅花園，享受冬天冰冷嘅雨水同埋風暴，又或者夏天嘅溫暖微風。今朝早，當個天仲未光嗰陣，我赤身行到附近樹林嘅一個池塘。每逢颳風落雨，我都唔使擔心會撞到其他人。到達池塘之後，我就踏入冰冷嘅水，喺塘入面游咗一陣，游完就上嚟返屋企。嗰種感覺真係好爽呀！我甚至唔記得咗自己係一線不掛。
成身赤裸嘅時候，連遇上滂沱大雨我都唔會介意——我出世時身穿嘅「生日服裝」會保護我，同時亦都可以避免衣服被淋濕嘅麻煩。真正出人意表嘅係，面對寒冷多雨嘅情況，裸身嘅反應同着衫嘅時候係好唔同。當我行過一條佈滿泥濘嘅林徑嗰時，我一滴都唔擔心對鞋會被啲泥整污糟，甚至好享受雙腳沾滿爛泥嘅感覺。於是我越嚟越堅信，人類本來就應該以裸體呢種狀態生活。有可能嘅話，請你都出去試吓，親自體驗我感受到嘅呢種自信同力量。例如下次到森林散步，不如開始試吓赤腳行啦。你所體驗到嘅一定會令你萬分驚訝。
圖片：Rockwell Kent
Chinaman Creek 