Please scroll down for the English translation!
《蛙文：家燕》
郭少鳳著
第一種俾到我記憶嘅雀仔就係燕子！我嘅嫲嫲住喺元朗嘅一條小鄉村 – 牛潭尾。細細個時，每逢過時過節，我嘅父母都會帶我哋返去探親兼做節。
嫲嫲住嘅木屋仔設計係相當有特色：一分為二嘅，客廳、睡房係喺主屋內，而厨房同廁所就起喺主屋外面，兩者中間有一個小小嘅空地，人多時，開張枱，放喺空地，就可以開飯。主屋係一間兩層高嘅木屋，因為以防水浸入屋，成間屋係起高咗，行三級梯級先可以入屋。由於屬於舊式嘅木屋設計，有屋簷，而呢啲屋簷正正適合燕子築巢。
記得以前等開飯時，會見到燕子飛嚟飛去：隔一陣就飛入屋，好快又飛出去，來來回回好多次。我問屋企人，佢究竟做咩？屋企人叫我細心望真啲。原來屋簷下有一個燕子巢，巢裏面有幾隻燕子啤啤，燕子飛入屋時，啲燕子啤啤就會將佢哋嘅小黃口張到好大好大，目的就係想燕子父母將含係嘴巴裏面嘅食物，喂入佢地嘅口中。
後來中學時期讀到白居易嘅《燕詩》，頭幾句正正就係描述呢個情景：
樑上有雙燕，翩翩雄與雌。
銜泥兩椽間，一巢生四兒。
四兒日夜長，索食聲孜孜……
後來知道呢種就係香港常見嘅燕子之一：家燕。家燕屬於易認嘅雀仔，尾部明顯開叉，好似較剪咁，全身以帶光澤嘅深黑藍色羽毛為主，腹部至腳為白色，面部至喉嚨為啡紅色，身形細小但飛行速度快，方便佢哋覓食空中飛行嘅昆蟲，如蚊、飛蟻、烏蠅、蜻蜓等，對於控制大自然嘅昆蟲數量起著好大嘅作用。
唔知大家有冇留意到，喺冬天好少會見到燕子呢？其實家燕係候鳥，佢哋通常會喺每年三月至七月飛嚟香港繁殖育雛。佢哋最鐘意喺騎樓下築巢，將啲濕泥一口一口咁擔回來，同幼草一齊黏喺騎樓下，要用成個星期嘅時間先起好個巢。作為候鳥嘅佢哋，方向感真係好好，每年長佂嘅路線都記得好清楚，佢哋亦唔需要每年起一個新巢，識得用返同一個。
好可惜近年有騎樓嘅舊式建築物被新式樓房取締，甚至被清拆，燕子巢都遭受破壞，亦難以揾到合適嘅地方築巢，所以燕子面臨著威脅，根據香港觀鳥會嘅資料，燕子巢嘅數量喺某啲地區，例如喺元朗市、上水石湖墟明顯減少。
記得白居易透過《燕詩》，借燕子孩子離巢而去，背棄辛苦凑大佢哋父母，儆醒作為兒女嘅要孝順父母。同樣哋，係傳統上，家燕同人類相當親近，屋企有燕子築巢係代表風水好，會帶嚟吉祥嘅意思；實際上，家燕屬於專食蚊蟲嘅益鳥，我哋甚至將佢哋命名為家燕，有「家」在其中，幾乎視為家庭成員，噉，我哋係咪應該要好好保護呢位親愛嘅老朋友！
“Frogscript ● Swallows”
by Evette Kwok
The first kind of bird to leave me with any kind of memory was the swallow. My grandmother on my father’s side lived in a small village in Yuen Long called Ngau Tam Mei. When I was a little girl, every time there was a festive occasion of some sort, my father and mother would take us to visit her and to join in in the celebrations.
