《蛙文》/ Frogscript 6 • 郭少鳳 Evette Kwok

Japanese Frog for Frogscript_Thumbnail_2 FEB 2018

Please scroll down for the English translation!

《蛙文:蝴蝶》

郭少鳳著

我對蝴蝶真係又愛又恨:每次行山都好大機會遇到佢哋,佢哋一啲都唔怕羞,總會出嚟打個招呼,有時會單獨赴約,有時會一雙一雙咁出現,有時甚至成群結隊喺一樖開緊花嘅植物上聚餐,見到咁嘅情景真係愛死佢哋。

但當我拎起部相機想同蝴蝶們影返張沙龍靚相時,佢哋總係企唔定,明明喺度採緊花蜜,但我一行到適合拍攝嘅距離,佢就會飛走,仲要喺我面前飛嚟飛去,又唔會飛到好遠,然後又停低再採花蜜,我跟住過去,但佢一見到我,又再飛走,唔知佢係特登整蠱我,定係想同我玩伏匿匿呢。有啲蝴蝶雖然會停下來採蜜,但又不停咁拍翼,總之好唔容易先會影到張靚相。不過有時我都會諗,我食緊飯嘅時候,都唔想俾人騷擾嘅。

其實細細個嘅時候對蝴蝶冇咩好感:老師教我哋蜜蜂係勤力嘅昆蟲,每天工作採花蜜,儲有足夠糧食可以渡過嚴寒嘅冬天;蝴蝶就啱啱相反,每日顧住扮靚、玩樂、唔願工作,到咗冬天佢哋就餓死嗮。雖然老師教識咗我哋勤力嘅重要性,但可憐嘅蝴蝶就俾我誤會咗咁多年,對唔住呀!

原來蝴蝶本來嘅壽命就唔長,視乎唔同嘅物種,長則幾個月,短則只有兩個星期,想想動物得短短兩個星期嘅壽命,佢哋會做咩?!蝴蝶就選擇履行天職,繁殖下一代。所以我哋好多時會以為蝴蝶只顧玩耍,互相追逐,其實佢哋嘅目的係求偶和交配。

唔知點解,蝴蝶俾我嘅感覺就係高傲嘅美女,佢哋花枝招展,擁有修長嘅身體,再配上美麗嘅翅膀。但同時又覺得佢哋係比較柔弱嘅生物,可能有太多天敵啩,包括青蛙丶蜥蜴、蛛蛛同埋螳螂,真係數極都數唔完,蝴蝶應該係食物鏈中最底層嘅生物。

生活喺最底層,蝴蝶要有保護自己嘅方法,有啲有保護色,成塊枯葉咁,避開天敵嘅視線;有啲鐘意扮嘢或者喬裝,佢哋嘅翅膀會有大眼睛嘅圖案,讓天敵以為係佢哋係較大型嘅動物而唔敢走近。

我屋企露台種著一樖小小嘅檸檬樹,記得有一次幫佢淋水時,喺葉面見到好多雀仔嘅便便,諗住用水沖走佢哋,但冲唔走,再望真啲,原來唔係鳥糞,係一條條嘅蟲蟲 — 蝴蝶嘅幼蟲,見到咁特別,即刻上網揾資料,原來係一種鳳蝶嘅幼蟲,扮成便便,避開敵人嘅目光,真聰明。同時心諗:蝴蝶果然係完全變態嘅動物,好難想像咁肉酸嘅蟲蟲,會化成蛹,再搖身一變,變成一隻姿態優雅嘅蝴蝶!

蝴蝶嘅幼蟲其實都幾揀飲擇食,如果植物唔啱佢哋嘅胃口,佢哋寧願餓死都唔食,佢哋只係會食所謂嘅寄主植物,所以蝴蝶都好聰明咁喺寄主植物產卵,好讓佢哋一出世就有嘢食。

西方人有羅蜜歐與朱麗葉,我地中國都有梁山伯與祝英台嘅故事,兩者都係喺當時社會制度下嘅犠牲品,為愛殉情嘅悲劇。但梁祝嘅故事多咗一份悽美感,梁祝二人死後,最終雙雙化成美麗嘅蝴蝶,在人間翩翩飛舞,從此蝴蝶係中國文化中或多或少都有渴求浪漫、追求自由嘅象徵。人嘅生命本來就同蝴蝶嘅壽命一樣咁有限,當我哋會問蝴蝶點樣過佢哋短短嘅生命時,我哋係咪都要問吓自己想點過呢!

Hong Kong Club Silverline Butterfly

Continue reading “《蛙文》/ Frogscript 6 • 郭少鳳 Evette Kwok”