Please scroll down for the English translation!
《蛙文： 蝸牛》
郭少鳳著
蝸牛呀！蝸牛呀！點解你咁慢嘅？！蝸牛俾人嘅感覺就係慢，可能係揹著一個同自己身體差唔多大細嘅背殼。不過正正因為佢走路慢吞吞，好多細路仔都好容易捉到佢。
喺香港呢個城市中心長大嘅我，細細個都冇咩機會走入大自然，慶幸喺舊時屋企附近，有一個大大哋嘅公園叫海心公園，裏面都有唔少嘅園圃同植物。去公園除咗玩千鞦、滑梯同搖搖板之外，最鐘意就係捉蝸牛玩。
記得有一段時間，成日捉蝸牛玩，一見到蝸牛，即刻捉住佢哋，但說時遲，那時快，佢哋次次都好快咁匿埋喺個殼裏面，想睇清楚佢哋嘅身體都唔得，好奇心重嘅我成日想掂吓佢哋傳說中軟淋淋嘅身體。仲記得試過放低蝸牛喺地下，等咗一陣，佢喐都唔喐，細路仔邊會咁好耐性咁慢慢等，於是我去咗其他地方玩，諗住佢轉頭會伸返個身體出嚟。玩咗一陣，諗住返去摸蝸牛，點知佢已經唔見咗，心諗：又話蝸牛行得慢嘅…
又有一次，將捉到嘅蝸牛放喺掌心，諗住等佢伸返個身體出嚟時可以摸下。終於等到啦，一見到佢嗰身體，就急不及待咁掂落去，一掂，佢就即刻縮返入個殼裏面，根本感覺唔到佢個身體係咪真係軟淋淋，自此知道蝸牛殼係幾咁重要，俾到非常怕羞嘅蝸牛好多安全感！
曾經聽講過，只要喺蝸牛身上灑鹽，蝸牛就會從殼中爬出嚟，不過聽到都覺得蝸牛會好痛，所以唔想做呢個實驗！從此之後，我一直認定蝸牛係又慢又軟弱無能嘅動物。
直到喺最近嘅工作上，認識咗一個識講流利廣東話嘅澳洲文學家，佢曾經形容自己似蝸牛，當時覺得好奇怪：點解一個咁叻、咁值得尊重嘅人會話自己似微不足道嘅蝸牛嘅呢？！係時候要再新認識呢種不被重視嘅蝸牛。
蝸牛通常係伴隨著雨水出現，我呢個朋友，啱啱識佢時，佢真係為香港帶嚟超多雨水，陪伴佢而嚟嘅係黑色暴雨警告同埋八號風球，你都咪話唔厲害。蝸牛喜愛潮濕嘅天氣，其實蝸牛係好好嘅指標：見到蝸牛代表天氣潮濕，好大機會會落雨，當然雨後更差唔多可以肯定遇見蝸牛。咁啱得咁橋，呢個朋友細細個時都鐘意捉蝸牛玩，通常捉一大堆，同佢哋舉辦蝸牛爬行大賽，據聞從來冇一隻蝸牛能爬到終點。
