芬蘭印象 • Finland Impressions

Evette Kwok_Finnish Forest_27 AUG 2018

Nuuksio National Park (Evette Kwok, 2018)

Please scroll down for the English translation!

郭少鳳著

我好鐘意芬蘭嘅森林,我哋去咗一個叫 Nuuksio National Park,第一天行了森林(混合咗樺樹同松樹),因為太鐘意呢個地方,所以第二日再去行多趟,仲去咗個好靚嘅湖泊游水,有野鴨陪我哋一齊游,又有蓮花,第一次喺水底踩到啲咁濕潤嘅泥土,真係超難忘嘅體驗(同時諗起一個澳洲朋友屋企嘅小水庫,好羨慕佢成日有機會同鴨仔游水)。

游水時冇意咁「品嚐」到湖水,嘩!啲水唔係鹹㗎,感覺好神奇。香港係一個沿海城市,沙灘多的是,喺鹹鹹嘅海水中游水並唔出奇,但香港冇天然嘅湖泊。第一次喺大自然嘅淡水湖游水真係好舒服,出水時,覺得身體好乾淨,同平時去完沙灘感覺太唔同,冇咗嗰份醃鹹魚嘅感覺,唔會覺得個身好污糟,要即刻沖水洗身。

芬蘭俾我嘅感覺係好先進、好發達、配套好好嘅地方,同日本有小小相似。最明顯嘅地方,佢哋嘅廁所都可以洗 pat pat。去過日本嘅人都知,日本嘅廁所板通常都有一個電動洗 pat pat 嘅設備,㩒制就會向你嘅 pat pat噴水;而芬蘭就會喺廁所旁邊配置一個小花灑,方便你洗 pat pat,兩者都可以確保你有一個乾淨舒服嘅 pat pat!

芬蘭人唔單止十分注重個人嘅清潔衛生,亦會保持城市嘅清潔,佢哋嘅街上好難會見到一舊垃圾。佢哋亦會注重城市嘅儀容。佢哋城市嘅外貌都好有品味,你好難會見到舖頭嘅大招牌,一定揾唔到五光十色嘅淘金舖頭,總之,佢哋嘅招牌一啲都唔浮誇,有好多時,你甚至唔知自己經過了一間舖頭或一間餐廳。

不過唔知點解,啲芬蘭人都好嚴肅,冇咩笑容(唔知同佢哋有個長長黑黑嘅冬天有冇關係?!)。仲有佢哋講嘢好「直接」,問咩就答咩,唔會講多餘嘅嘢,同埋佢哋對自己國家有一種無明嘅優越感。雖然係咁,唔代表佢哋唔友善:我哋曾經被邀請搭一架順風車,被送到一個就近嘅巴士站。芬蘭人亦好樂意回答問題,當然佢哋英文好好,溝通冇問題。

芬蘭人好熱愛森林同夏天,喺我哋喺芬蘭短短嘅4日內,見到好多人都想同陽光玩遊戲:行森林、游水、燒野食、露營、飲酒食飯,總之好盡情享受夏天、白天…

Continue reading “芬蘭印象 • Finland Impressions”